5:30am已經要起身喇~ 未訓醒，眼都「mon」唔大...... 開始後悔住o係高雄，要早咁多起身~
5:45am電話響起，酒店服務員話：「你們有朋友已經到樓下接你們~」哇！王經理仲早左到，佢幾點起身架?！本身「慢吞吞」既我地，「喇喇林」「係咁耳」執下d眼耳口鼻就落樓喇~
是日早餐：
咁早起身當然未食早餐喇！王經理就車我地去「內湖來來豆漿」食早餐~ 原來果度d豆漿好出名架，我地一飲就真係覺得唔同我地平時飲開既，果度d豆漿有「焦」既香味，唔似我地飲開沖粉既豆漿，食物方面亦唔錯，d荵油薄香+脆，鍋貼、小籠包果d都幾好味，唔怪之得一大早都好多人去幫襯~
食飽後繼續車程，大約7點鬆d就到NY舖頭喇！
造型師Lisa(沛雲)一早已經番到來等我地，所以可以即刻開始化妝！王經理話尋日岩岩打完風，仲係陰天，唔知道外景會唔會落雨，所以不停幫我地問天氣情況。
化化下妝，王經理話今日天氣仲未ok，所以問我地可唔可以留多日在高雄，如果ok的話，可以delay一日先拍外景，咁出來既效果會靚d~ 好彩我地未book台北既酒店，所以可以delay多一日，希望聽日同後日真係可以有藍天白雲影喇！！！
由於stay多一日，為左方便影相，我地主動問王經理，最後果兩日可唔可以o係「阿曼汽車旅館」度住，咁就唔洗咁早起身，又可以影埋MOTEL景丫嘛！王經理就「喇喇聲」幫我打去book添~ 哈哈，所以頂多都係早起埋聽朝啫！
初時我地以為王經理話delay影外景，即今日唔洗影，點知佢話今日先影Studio~ 哈哈，本身比2日既錢，變成可以影3日！有點為禍得福，「so」左添~
今日先影3套衫，咁剩低果4套就可以分兩日著，唔洗出外景時頻頻換衫咁趕喇！起初我地都好精神架，但由於太夜訓、太早企身既關係，影影下我地已經開始「蛤眼訓」......
仲以為會好快影哂，原來唔係架！ 佢地好認真，真係逐層逐層咁幫我地影~ o係佢地「紐約時尚」舊館影完5層，休息一陣再去新館「求愛工坊」果橦影~ 倦到爆呢！影影下都唔識笑呢~
影到晏晝差唔多3pm，終於影完可以「放飯」喇！！！
化妝師Lisa同服務小姐阿朱帶左我地去食當地出名既鴨肉同牛肉麵呀！d鴨肉唔好似我地平時食開果d，鹽鹽地、陣味幾特別架！
食完野番舖頭hair左陣，王經理就番黎去我地番高雄喇！由於時間尚早，我地決定去行下高雄最大既「夢時代」商場，王經理就直接車我地過去，車程成個鐘頭架，如果搭的士去，我諗真係「好溶」呢！好彩NY包接送咋~~~
各位有幸去到高雄一定要去試下「西堤牛扒」！！！王經理真係冇介紹錯~~~
$499台幣(即$125港紙)，就算加左一，都係$137港紙左右，有8道菜大餐食！！！
最正既就係佢地既服務態度，你每揀一道菜，個waiter/waitress都會耐心為你介紹，好似我揀「烤焗蘑菰」做前菜，佢就會為我解說：「這道菜是用蘑菰xyz...... 味道有點xyz...... 食的時候可以伴麵包一起吃」。
見佢地服務態度好到爆，諗住比幾十蚊台幣做tips喇！點知佢地話唔可以收tips，死都要找番比我~~~
番到酒店，唔敢咁夜訓喇~~~ 因為聽朝都係5點幾就要企身~
沒有留言:
張貼留言