10月7日
颱風開始減弱喇~ 晏晝5:45pm，陸上警報全部取消，雨勢比以前細左。趁住呢段「好天」少少既時間，我地出左去遊覽一下高雄既市中心~
先搭的士去著名既「愛河」。一落車，我地兩個既感覺就係：「下?！乜就係咁架咋！」 哈哈，可以講既係維多利亞港靚過佢多多聲~ 當係見識過就算喇！
跟住行去「六合夜市」食野。「六合」比台北既「士林夜市」細好好好多，得一條巷仔，但衛生程度比「士林」好好多！起碼條食街行兩步都見到垃圾筒，唔會周地垃圾~
終於來到六合夜市！開餐lu~
「啫啫花式造型熱狗」有好多唔同口味既熱狗腸揀，我地揀左檸檬味NT$30/串~
「烤肉之家」有好多唔同部位既烤肉賣，我地買左烤雞心 NT$25/串、七里香NT$25/串、烤雞翼NT$35/串~
芒果果肉冰砂NT$50，真係有果肉架！
「大爺臭豆腐」NT$45/份，唔係好臭，炸得幾香口，切到細細份，食哂成碟都唔會覺得滯~
蟹腳 NT$120/份，但涷哂、又淋，好難食！
最後我地去左食「三媽臭臭鍋」，分別點左個「豬腸鍋」同「海鮮鍋」NT$200/鍋~ 好飽呀！
食飽飽後就番酒店休息~ 番到去無耐房間電話就響起，原來係Tiffany打來，提醒我地今晚要早d訓，王經理睇過天氣報告，聽日應該可以如期影相，佢仲會6am準時來到我地酒店樓下接我地添！換言之，我地聽日要凌晨5點幾企身呢~
唔知係咪心情緊張，仍然擔心聽日既天氣狀況，所以就算12點幾訓落床都係訓唔著......
沒有留言:
張貼留言