我們的家 - 簽了臨時買賣合約

aa

尋找Our Sweet Home (Part 2)

今日day-off，所以等Jay放工後又可以出動睇樓呢~ 哈哈，近來既活動應該係睇樓多啦！今晚就去左「南浪海灣」、「海典軒」同「嘉悅半島」睇樓。

未去睇前，我地兩個覺得果度交通還算ok，雖然係巴士尾站，可能冇位坐，但都叫做乜車都有，去香港、九龍、新界既都有，仲o係正樓下。起碼好過我住緊既富泰村先丫！講起又講，我好憎自己住緊果度，所以一定唔會徙錢買「聚康山莊」、「倚嶺南亭」呢d「公屋」私人樓！

先睇「海典軒」--> 哇！樓下大堂裝修靚到爆，同5星級酒店有得「fight」！點知一上到去睇先知原來果度近車站係「死路」一條，嘈到爆呀！！！夜晚如果唔閂窗根本冇可能訓得著！果個所謂既環保露台，真係可有可無，簡直係浪費間屋既實用面積，出面個view對住哂馬路，你都唔會有心o係個露台睇風景食塵啦！

樓下對正屯門公路入口同學校，想唔嘈都幾難~

哈哈，最搞笑係，上到去個個業主都閂哂個廳隻窗~因為可能佢地都覺得開窗太嘈，連電視聲都cover左掛！所以「海典軒」雖然睇左好多個單位，但都冇個岩~

跟住去左「南浪海灣」，雖然遠離d輕鐵站+公路，但都唔靜得幾多~呢度賣點係高樓底 +有落地玻璃窗，面積係3個屋苑中價錢差不多、但比較大既！呢度樓底高到可以放得落果d歐洲feel吊燈，望落間屋即刻闊落好多。落地玻璃似乎冇乜用，望出去d景又係......唉，打開窗又係好「應聲」下，下面仲有間學校添！朝早早會一定嘈爆，番「P」下下比佢地嘈醒真係想殺人！一定唔住得~

睇左果度其中一個海景單位，價錢+尺數都ok，係個海景麻麻，因為係中間「隙」望海，側邊比其他building阻左少少，唔似得「邁亞美」果d咁開揚......

最後去左「嘉悅半島」，係當中最遠離車站既。雖然話係最遠，但行路只需5分鐘路程，都acceptable既。可能遠離左路邊，所以係當中最靜既屋苑！可惜單位既實用面積比率唔係咁好，個廳好似好細咁。而且，價錢岩既單位，又唔係對正海景，又係側望果隻...... 所以都唔會考慮~

總結今日既經驗：「南浪」果邊可以OUT，因為：

1.太嘈

2.價錢ok既單位所provide既景唔算吸引(幾乎全部都向馬路)

3.尾站(搭車可能冇位坐)

另外，Jay亦明白我所講既「市中心人多會好嘈既意思」啦！雖然市中心交通係好好，但交通好既地方一定多車 --> 多車就會好嘈~ 唔向馬路既單位，就會係樓望樓 --> 變相冇哂privacy~ 所以，我地兩個都決定OUT埋市中心呢！

而家打算主攻碼頭「邁亞美」、「海翠花園」果d！每個地方都有佢既pros & cons，雖然果度係靜，但亦有佢既缺點，就係舊樓齡，起碼14、15年，搬入去住裝修都幾「金」架！

但無論係租、係買，有時間冇野做，睇下都冇仿丫！如果計計下買樓真係唔化算，而家睇樓既經驗都可以幫到我地遲d租屋揀盤丫嘛~~~

尋找Our Sweet Home (Part 1)

由於呢輪股市係咁升(30000點喇！真係好黐線！），所以d樓價又係咁升......初時諗住結婚後租樓住，等過多幾年先買樓，但而家咁升法，我地再唔買，過多幾年真係買唔起啦！所以局住「啦啦林」去睇樓~

之前同Jay d屋企人傾過，佢地都肯借錢幫下我地，但就建議我地買屯門市中心好d！話有升值潛力喎~ 但我鍾意住向海景既單位，所以我就prefer碼頭/南浪海灣果邊多！

佢屋企人又話買樓最緊要係有冇得升值......我真係唔明點解佢地成日都諗錢錢錢.......買市中心係人係鬼都知道方便，但都要個人住得舒服先得架?！放工番到屋企都要去d咁多人既地方，仲要屋望屋「密質質」全無私人可言，真係屋企唔開電視，望向隔離屋「黐」電視睇都得！做人點解要咁辛苦呢?！放左工都要咁大壓力！唔通真係為左升值就應該咁樣過一世???

尋日我地去左碼頭「邁亞美」睇樓，我自己就好鍾意個位置，果度有海景，近碼頭車站，又近附近d食肆，真係幾方便架！上到去睇左幾個單位，雖然唔算大，但o係屋望出去既環境就好舒服啦！放左工真係需要呢d寧靜自然既環境比自己心寧靜下、休息下~

從屋內睇出去，可以見到180度既海景呢！

Jay都好鍾意「邁亞美」呀~睇完樓後連佢自己都覺得間屋既view好緊要，會影響到人既心情！

哈哈，我同佢講，如果買市中心都得，但一定要>600尺既單位囉！市中心已經人多、密度高，如果連間屋都鬼咁細，生完仔我一定會產後抑鬱丟個仔落街！佢知道以我咁emotional既性格，真係有可能架！順手問下agent市中心600零700尺既單位幾多錢，agent話預$2400-$2700/尺，睇view同間隔而定。計一計數，600尺 x $2400 = $140萬~哈哈，咁貴，唔洗諗呢！Out得！

呢期放工後都係日日去睇樓多，盡量睇多d唔同既單位先決定~