好好好好玩呀！！！
今日9:15am去到3V化妝-->8:30pm先番到3V呢~~ 倦死人啦~~~
住宿篇
之前睇深圳天氣報告話今日：「多雲有雨」，所以未影之前都幾擔心今日既天氣呢！
我同Jay早左上深圳，諗住小休兩日抖足精神今日影相！睇新假期d旅遊書介紹，book左間平酒店住---如家快捷酒店(深圳口岸店)，行去3V都係10分鐘路程咋！ 我地住既係「商務大床房」$219，都幾靚+乾淨架，有哂牙膏、牙刷、拖鞋提供，仲有張6尺大床呢！
酒店房間很乾淨企理，$219/night算很超值呢！
酒店樓下有間食肆有得食d地道小食，價錢平得來，味道仲唔錯添呀！「懶鬼」既我地緊係o係樓下食完就番上去「覺覺豬」抖足精神準備第日影相喇！
點知我地住果間酒店好嘈呢，6am對面地盤已經開工啦，間房好似零隔音咁，所以我地訓得果3、4個鐘...... 我諗係我地向住工地既問題，向另外一邊應該可以好寧靜咁一覺訓到天光呢！
未訓前我地兩個好似白癡咁對住塊鏡練笑，又抄d台灣相高難度pose練習...... 哈哈，原來冇乜用呢......
6am一起來，就「啦啦聲」拉開窗lim睇下出面既天氣：「有藍天，少少白雲，但又有少少黑雲」，我地兩個就祈禱，千萬唔好落雨呢！！！
扮靚靚篇
3V服務小姐Lily尋晚打來約我地9:15am到3V，我地當然唔敢遲到啦！！9:15am準時上到去~~~
上到去，哇，原來3V個個staff已經開緊工啦！劉政佢地用緊電腦執相，服務小姐YoYo、化妝師彩雲、同禮服化妝助手路屏，都已經準備好哂！我不禁懷疑佢地究竟幾點開工既呢??!! 真係唔洗休息既??!!
彩雲好快手咁幫我化左個底妝，唔知係咪未見過自己化濃妝個樣，我同Jay都覺得怪怪地咁~~
跟住我就去揀衫啦~~~ 我揀左1套長拖尾婚紗、1套小拖尾魚尾婚紗同1套粉紅色晚裝。但我比個model公仔吸引左，好鍾意個公仔著住果套公主衫呀！！！好想好想影埋呢套衫~~~ YoYo小姐好好人，比我加$200加多呢套宫庭公主衫影室內，仲送多左個造型比我，等我可以一圓我個「公主夢」呢！！！所以我有2套室內(宫庭公主衫+粉紅晚裝）、長拖尾婚紗影公園、小拖尾魚尾婚紗影海灘呢~~~
揀完衫後，就繼續化埋個妝呢~ 今日冇另外一pair新人，淨係有另外一個香港女仔影單人照，所以化妝師彩雲都唔算太忙！Jay好擔心佢d暗瘡印會遮唔哂，但結果路屏都幫佢遮得好好，at least唔會見到一粒粒突起哂丫！
Studio篇
準備就緒就先開始影室內棚景，我地兩個都好緊張呢！d燈照住我地頭殼頂，加上棚景內冷氣不流通，我地影左一陣已經出哂汗呢！真係唔敢想像一陣出外景時會有幾「濕」！
彩雲幫我做每一個造型我都好喜歡！！！襯粉紅色晚裝，佢就幫我用電髮捲好好心機咁電lun哂成個頭d頭髮，好靚、好自然呢~
跟住就換宫庭公主衫，哈哈，雖然Jay話我有d衣不襯身(因為我好矮、膊頭好A，又冇乜身材，所以carry得套衫唔靚)，但為左做下公主，我都唔理得咁多啦！ 況且，我相信劉政大師一定可以「就」角度影我得靚靚既~ 呢套衫彩雲幫我set左個高貴feel 既頭，哈哈，有d睇唔慣自己咁成熟既樣呢，但好鍾意佢幫我加左頂王冠呢！！！
我最愛既「公主」look~ 彩雲幫我set左個很靚既頭呀！即刻grand哂~
好不容易影完哂室內景，已經係lunch時間啦~~~ 但因為：
1. Girdle cool得我好辛苦，勁緊，食野一定會頂住個胃~~~
2. 我唔識得點樣著住套「長賴賴」既婚紗去廁所，我驚我會整到污糟哂~~~
所以我唔敢食野，連水都唔係好敢飲...... Jay好衰呢，佢仲笑我話佢去廁所就方便過我好多，所以會狂飲水補充水分咁話......
等佢飲飽食醉後，大約2:30pm我地就出發去影外景啦！！！出面個天已經灰灰地，真係要爭取時間呢！！！
外景篇 -- 洪湖公園
哈哈，本來Package寫既係去「東湖公園」，但唔知點解會車左我地去「洪湖公園」，唔知係咪同一個地方，只係譯音唔同呢?！反正劉政o係邊度都可以影到靚相，我地就冇去諗點解了~
撞岩洪湖公園有荷花展，哇！！！一眼望過去有好大好大好大既荷花池呀，雖然冇乜花開，但淨係見到咁多荷葉已經覺得好壯觀啦！好期待睇下劉政幫我地o係荷花池影既相呢~
唔知點解雖然天上有灰雲，但陽光依然好勁，哂到我地係咁滴汗。我d汗仲勁過Jay，哈哈，彩雲都笑我：「哇，你好大汗呀~ 妝都快溶掉囉~」她不停用tissue幫我地兩個大汗怪擦汗，真係辛苦哂佢呢~ 彩雲真係勁細心！！！
好不容易先拍完公園景，我地個妝都溶左一半呢~ 跟住就要join埋影單人照果個香港女仔去最後一站：溪沖海邊
外景篇 -- 溪沖海灘
去溪沖海邊要成個鐘頭車程，一上車冇耐我就倦到訓著左，一起身mum大眼就已經到左啦！見到大海呀，好大浪呀~~ 仲有清涼既海風~ 同頭先公園濕濕局局既感覺完全唔同，當堂成個人生猛哂！
岩岩到海灘落車，預備轉/補妝~ 我地兩個都熱到傻左呢！塊面出哂油~
溪沖海邊周圍泊滿哂攝影公司既Van仔，落海灘一睇，真係唔野少，成個海灘望通去都有好多小白點，大大話話at least有20 pairs人o係度影緊相，真係插針都難呀！
劉政叫我地兩個拖住手o係沙灘跑，真係好高難度呢！我條裙又窄又長，每踩一步都會向下沉，差d pk呢~ 跑左好幾次，已經好疲倦，好彩終於有一take劉大師肯「收貨」！
劉大師叫我地做左好多高難度動作(對於兩個長年唔做運動既人來講，真係好大運動量)，又R腰、pak o係沙地、要Jay抱起我...... 但每次佢影到覺得滿意既相，都會拎過來比我地睇，睇完真係驚訝到我地O哂嘴+「哇！」一聲叫左出來！！！完全好難想像一個唔靚+堆滿垃圾既沙灘，可以影到好似外國d沙灘feel，劉政真係好好好好掂呀！！！有輯咁靚既婚紗相，我地覺得就算今日幾辛苦，濕哂身都係值得呢！！！
Sharing~
最後，經過今日既拍攝，想o係呢度分享一下我對3V既一d感想呢~
未影相前，我一直擔心自己join既係平價plan，擔心會冇其他新人咁好service...... 但原來我既擔心係白費既！！！
3V每個工作人員都好用心幫顧客拍照，無論你比幾多錢都好，佢地都會用最大既努力去「訓身」幫你影靚相！(哈哈，劉政訓身幫我地影相既次數，仲落力過我地兩個呢！) 當然，貴plan有佢貴既地方呢，d景真係靚到引死人呀！我會努力儲錢下次去更靚既景影相啦！！！
首先，我地最多謝攝影師劉政！佢對我地d相要求好認真嚴格！Jay成日「假笑」，劉政就不停影同一個shot直到我地兩個既表情令佢滿意為止！o係海灘有個shot，閃光燈配合唔到，佢就影左20幾takes直到滿意為止！我地都覺得佢真係好pro、好尊重每位客人，不惜自己辛苦一d，都要幫客人影到靚相！！！讚讚讚~
化妝師彩雲真係好好，幫我做左4個完全唔同既造型，仲要個個都好鬼靚呢~ 冇話因為我join平plan就求求其其！跟外景其間仲照顧得我地好周到，我地一有少少汗，佢就會不停幫我地擦汗，我知道其實佢都係一樣好熱呢~ 讚讚讚~
服務小姐YoYo同Lily，兩個都好nice、好helpful，又好主動同我地傾偈呀！哈哈，可能我地兩個比較怕羞同慢熱呢，所以影完相先開始同佢地熟落d~ 讚讚讚~
仲有好多謝禮服化妝助手路屏小姐，好多謝佢幫我地揀衫，又不停幫我地換衫同拎野，最後仲幫我地手吹泡泡！！！讚讚讚~
攝影助手(冇問到佢個名呢)，好努力幫手remind Jay點樣擺pose，又走來走去幫我地打燈~ 佢好慘呢，o係公園比蚊咬左好多啖呢！讚讚讚~
我諗呢d就係佢地點解堅持1：1拍攝，唯有咁先可以做到每對新人都可以服侍得好周到！
今日真係辛苦哂3V各位員工，你地辛苦一日，就換來我地兩個一生中其中一段最珍貴、最開心既回憶！！！Thank you very much to all of you~
